टीम लोकमन मंगळवेढा |
लोकसभा निवडणुकीचे निकाल लागल्यानंतर राज्याच्या राजकारणात वायूवेगाने घडामोडी घडत आहेत. उपमुख्यमंत्री देवेंद्र फडणवीस यांनी राज्यातील भाजपाच्या पराभवाची आणि खराब कामगिरीची जबाबदारी स्विकारली आहे. फडणवीस यांनी तर उपमुख्यमंत्रीपदाचा राजीनामा देण्याची तयारीच दाखवली आहे. त्यापाठोपाठ आणखी एक मोठी बातमी समोर येत आहे. राज्याचे माजी मुख्यमंत्री व शिवसेना पक्षप्रमुख उद्धव ठाकरे यांनी NDA मध्ये परत यावं यासाठी भाजपाकडून जोरदार प्रयत्न सुरु झाले आहेत. एका केंद्रीय मंत्र्याकडे उद्धव ठाकरेंशी चर्चा करण्याची जबाबदारी सोपवण्यात आल्याची माहिती आहे.
भाजपा आणि शिवसेना यांची महाराष्ट्रात 25 वर्षांपेक्षा अधिक काळ युती होती. 2019 साली झालेल्या विधानसभा निवडणुकीनंतर मुख्यमंत्रीपदाच्या मुद्द्यावरून ही युती तुटली. उद्धव ठाकरे काँग्रेस आणि राष्ट्रवादी काँग्रेस यांच्या पाठिंब्यावर मुख्यमंत्री झाले. त्यानंतर अडीच वर्षांनी शिवसनेत फूट पडली. एकनाथ शिंदे यांच्या नेतृत्त्वाखाली आमदारांचा मोठा गट शिवसेनेतून बाहेर पडला. भाजपाच्या पाठिंब्यावर सध्या एकनाथ शिंदे राज्याच्या मुख्यमंत्री पदावर विराजमान आहेत.
महाराष्ट्रात लोकसभा निवडणुकीत भाजपा शिवसेना आणि राष्ट्रवादी काँग्रेसच्या महायुतीचा मोठा पराभव झाला. भाजपाला केवळ 9 जागा मिळाल्या. शिवसेना उद्धव बाळासाहेब ठाकरे यांच्या पक्षानंही 9 जागा जिंकल्या. लोकसभा निवडणुकीत भाजपाची देशभरातही मोठी पिछेहाट झाली. त्यांचे संख्याबळ 303 वरुन 240 वर घसरले. तर एनडीएला 292 जागा मिळाल्या.
या निवडणूक निकालानंतर भाजपानं नव्या मित्र पक्षांचा शोध घेण्यास सुरुवात केली आहे. त्याचाच भाग म्हणून उद्धव ठाकरेंना परत एनडीएमध्ये आणण्यासाठी मोठे प्रयत्न सुरु झाले आहेत. एका केंद्रीय मंत्र्याला याची जबाबदारी देण्यात आली आहे. अशी माहिती अधिकृत सूत्रांकडून मिळत आहे.
