टीम लोकमन नातेपुते |
पुणे- पंढरपूर मार्गावरील सोलापूर जिल्हा हद्दीत कारुंडे ता.माळशिरस येथे पुलावर झालेल्या कार व टेम्पोच्या अपघातात चार जणांचा मृत्यू झाला असून या अपघातात तीन जण गंभीर जखमी झाले आहेत. हा अपघात रविवार सकाळी आठच्या सुमारास झाला आहे. अपघात एवढा भीषण होता की यामध्ये दोन्ही वाहनांचा अक्षरशः चुराडा झाला आहे.
याबाबत मिळालेल्या प्राथमिक माहितीनुसार, इंदापूर तालुक्यातील लासूर्णे येथील राजेश शहा हे आपल्या कामगारांना घेऊन सातारा येथील कासपठार पाहण्यासाठी निघाले होते. ते नातेपुते येथून राँग साईडने निघाल्याने हा अपघात घडल्याचे सांगण्यात येत आहे. लासूर्णे येथून फक्त 20 किमी अंतरावर असणाऱ्या माळशिरस तालुक्यातील कारुंडे येथील पुलावर सकाळी 8 वाजण्याच्या सुमारास टेम्पोने कारला धडक दिल्याने हा भीषण अपघात झाला आहे.
ग्रामस्थांच्या मदतीने जखमींना रुग्णालयात दाखल करण्यात आले
यामध्ये राजेश अनिल शहा (वय 55), दूर्गेस शंकर घोरपडे (वय 28), कोमल विशाल काळे (वय 32), शिवराज विशाल काळे (वय 10) या चौघांचा जागीच मृत्यू झाला. तर या अपघातात आकाश लोंढे (वय 25), पल्लवी बसवेश्वर पाटील (वय 30), अश्वीनी दूर्गेश घोरपडे हे जखमी झाले आहेत. सदर अपघाताची माहिती मिळताच सोलापूर ग्रामीण पोलीस दलातील वरिष्ठ पोलीस अधिकारी घटनास्थळी दाखल झाले. जखमींना ग्रामस्थांच्या मदतीने उपचारासाठी हलविण्यात आले आहे.
