टीम लोकमन मंगळवेढा |
पंढरपूर-मंगळवेढा विधानसभा मतदार संघाचे महाविकास आघाडी व मित्र पक्षाचे अधिकृत उमेदवार अनिल सुभाष सावंत यांच्या प्रचारार्थ रविवार दिनांक 17 नोव्हेंबर 2024 रोजी सकाळी 10.30 वाजता मंगळवेढ्यातील आठवडा बाजार मैदानात संसदरत्न खासदार सुप्रिया सुळे यांची जाहिर सभा आयोजित करण्यात आल्याची माहिती राष्ट्रवादीचे नेते व रतनचंद शहा सहकारी बँकेचे चेअरमन राहुल शहा यांनी दिली.
राष्ट्रवादी काँग्रेस शरदचंद्र पवार पक्षाचे खासदार धैर्यशील मोहिते पाटील यांच्या मार्गदर्शनाखाली जेष्ठ नेते वसंतनाना देशमुख, शहराध्यक्ष सुभाष भोसले, तालुकाध्यक्ष संदीप मांडवे, माजी नगरसेवक संतोष नेहतराव, रतनचंद शहा सहकारी बँकेचे अध्यक्ष राहुल शहा, मंगळवेढा शहराध्यक्ष चंद्रशेखर कोंडुभैरी, कार्याध्यक्ष संतोष रंधवे यांच्या नेतृत्वाखाली पंढरपूर शहर, मंगळवेढा तालुक्याचा ग्रामीण भाग आणि मंगळवेढा शहरात अतिशय नियोजनबद्ध यंत्रणा राबवली जात असून तुतारी हे पक्षचिन्ह घरोघरी पोहोचवण्यात यश आले आहे.
पंढरपूर शहरातील आजी माजी नगरसेवक, काँग्रेस पक्षाचे अनेक पदाधिकारी, ग्रामीण भागातील अनेक पदाधिकारी कामास लागले आहेत. शुक्रवारी राष्ट्रवादीचे आरोप प्रदेशाध्यक्ष जयंत पाटील यांची भव्य सभा शहरात संपन्न झाली. त्यामुळे पंढरपूर शहर आणि तालुक्यात राष्ट्रवादी काँग्रेसचे उमेदवार अनिल सावंत यांचे नाव घरोघरी चर्चेत आले आहे.
मंगळवेढा शहरातील शिवप्रेमी चौकातील आठवडा बाजार येथे आज रविवारी सकाळी 10.30 वाजता पक्षाच्या लोकप्रिय खासदार सुप्रिया सुळे यांची भव्य प्रचार सभा आयोजित करण्यात आली आहे. या सभेसाठी मोठ्या संख्येने राष्ट्रवादी काँग्रेस शरदचंद्र पवार पक्षाचे पदाधिकारी, कार्यकर्ते व नागरिकांनी उपस्थित राहावे असे आवाहन राष्ट्रवादी काँग्रेस शरदचंद्र पवार पक्षाच्या वतीने करण्यात आले आहे.
