टीम लोकमन मंगळवेढा |
महाराष्ट्र राज्यातील एसटी बस अपघाताची गोंदियातून एक मोठी बातमी समोर आली आहे. शिवशाही बस उलटून जवळपास 7 ते 8 प्रवासी ठार झाले आहेत. तर अनेक प्रवासी गंभीर जखमी झाले असल्याची माहिती समोर येत आहे. हा अपघात आज दुपारी 1 वाजताच्या सुमारास गोंदिया-कोहमारा मार्गावरील डव्वा जवळ झाला आहे. धक्कादायक बाब म्हणजे या अपघातातील मृतांची संख्या वाढण्याची शक्यता वर्तविण्यात येत आहे.
या अपघातासंदर्भात मिळालेली अधिक माहिती अशी, गोंदिया येथे बस उलटल्यानंतर आतापर्यंत 8 मृतदेह बाहेर काढण्यात आले आहेत. मृतांचा आकडा वाढण्याची शक्यता असून मुख्यमंत्र्यांनी अपघातग्रस्तांना तातडीने 10 लाख रुपयांची मदत जाहीर केली आहे.
मिळालेल्या माहितीनुसार, भंडारा-गोंदिया ही शिवशाही बस शुक्रवार दिनांक 29 रोजी दुपारी भंडाऱ्याहून गोंदियाकडे जात होती. बस चालकाने एका दुचाकीला ओव्हरटेक करताना डव्वा जवळ बस उलटून जवळपास 20 फूट रस्त्यापासून घासत गेली. त्यामुळे बसमधील 11 प्रवाशांना मृत्यू झाला तर 29 प्रवासी जखमी झाले आहेत.
गंभीर जखमी असलेल्या प्रवाशांची संख्या अधिक असल्याने यात मृतांचा आकडा अजून वाढण्याची शक्यता वर्तविली जात आहे. डव्वा येथील रहिवाशांनी अपघातस्थळी धाव घेत बसमध्ये अडकून पडलेल्या प्रवाशांना बाहेर काढण्यासाठी मोठी मदत केली. 108 रुग्णवाहिका बोलावून जखमींना गोंदिया येथील शासकीय वैद्यकीय महाविद्यालयात दाखल करण्यात आले आहे.
अपघाताची माहिती मिळताच डुग्गीपार पोलिस स्टेशनचे पोलिस अधिकारी व कर्मचारी घटनास्थळी दाखल झाले असून मदत कार्यास सुरुवात केली आहे. जखमी व मृत प्रवासी हे गोंदिया जिल्ह्यातीलच असल्याची शक्यता वर्तविली जात आहे. दरम्यान भीषण अपघातामुळे गोंदिया-कोहमारा मार्गावरील वाहतूक काही काळासाठी ठप्प झाली होती.
