टीम लोकमन मंगळवेढा |
संपूर्ण महाराष्ट्रासाठी अभिमानास्पद अशी बातमी समोर येत असून सरहद संस्था आयोजित अखिल भारतीय साहित्य महामंडळाचे 98 वे अखिल भारतीय मराठी साहित्य संमेलन दि. 21, 22, 23 फेब्रुवारी 2025 या काळात दिल्लीला होणार आहे. माजी केंद्रीय कृषिमंत्री, जेष्ठ नेते शरद पवार यांची या साहित्य संमेलनाच्या स्वागताध्यक्षपदी निवड करण्यात आली आहे.
जवळपास 70 वर्षांनी पुन्हा एकदा दिल्ली मराठी साहित्य संमेलनासाठी सज्ज होणार आहे. दिल्लीत होणाऱ्या या साहित्य संमेलनाचे आयोजन सरहद संस्थेच्या वतीने करण्यात आले आहे.
तत्कालीन पंतप्रधान पंडित नेहरु होते उद्घाटक
यापूर्वी 1954 साली दिल्लीत 37 वे अखिल भारतीय मराठी साहित्य संमेलन झाले होते. त्याचे स्वागताध्यक्ष काकासाहेब गाडगीळ होते. संमेलनाध्यक्ष तर्कतीर्थ लक्ष्मणशास्त्री जोशी तर उद्घाटक तत्कालिन पंतप्रधान पंडित नेहरु होते. संयुक्त महाराष्ट्र चळवळीला या संमेलनानंतर बळ मिळाले आणि 1 मे 1960 साली महाराष्ट्र राज्याची स्थापना झाली. त्यानंतर दिल्लीला एकदाही अखिल भारतीय मराठी साहित्य संमेलन झाले नव्हते.
दिल्लीतील या कार्यक्रमात महाराष्ट्राचे मुख्यमंत्री एकनाथ शिंदे, मनसे अध्यक्ष राज ठाकरे, केंद्रीय रस्ते वाहतूक मंत्री नितीन गडकरी यांचे नाव देखील निमंत्रितांमध्ये आहे. याशिवाय उपमुख्यमंत्री अजित पवार, केंद्रीय विमान वाहतूक मंत्री मुरलीधर मोहोळ, आमदार चंद्रकांतदादा पाटील आणि भारतीय जनता पार्टीचे राष्ट्रीय सरचिटणीस विनोद तावडे यांचे सहकार्यही या संमेलनाला लाभले आहे.
शरद पवार यांनी यापूर्वी औरंगाबाद (2004), नाशिक (2005), चिपळूण (2013) आणि सासवड (2014) येथील अखिल भारतीय साहित्य संमेलनाचे उद्घाटन केले आहे. तर 1990 साली त्यांनी स्वागताध्यक्ष व्हावे असे पुण्यातील संमेलनात समितीने ठरविले होते. मात्र त्यावेळी ते होऊ शकले नाहीत. पण राजधानी दिल्लीत होणाऱ्या पहिल्या साहित्य संमेलनाला साहित्यिक राजकीय सामाजिक अभ्यास असणारा माणूस रहावा म्हणून सरहद संस्थेने शरद पवारांना विनंती केली होती. या विनंतीला मान देत शरद पवार यांनी स्वागताध्यक्षपद स्वीकारले असल्याची माहिती समोर येत आहे.
