निसर्गाची अवकृपा ! विद्येच्या माहेरघरात मुसळधार पाऊस, पुण्यात पावसाचे चार बळी ; भोजनालयावर दरड कोसळून एकाचा मृत्यू तर अंडा भुर्जीच्या स्टॉलवरील तीन तरुणांचा शॉक लागून दुर्दैवी मृत्यू

पुणे : अमोल रत्नपारखी

पुण्यात रात्रभर पडणारा मुसळधार पाऊस आणि त्याचवेळी खडकवासला धरणातून सुरू झालेला 40 हजार क्युसेकचा विसर्ग यामुळे पुण्यात अतिशय भयानक अशी पूरस्थिती उद्भवली आहे. यामुळे पुणेकरांमध्ये भीतीचे वातावरण असून महाराष्ट्राच्या विविध भागातून पुण्यामध्ये कामानिमित्त गेलेले लोक रस्ते जाम झाल्यामुळे पुण्यातच अडकून पडले आहेत.

पुणे शहरातील अनेक भागात पावसाचे पाणी शिरले आहे. पुण्याच्या निंबजनगर, एकता नगर भागात जवळपास 4 ते साडेचार फूट पाणी साचले असून त्यामुळे गाड्या पाण्याखाली गेल्या आहेत. शेकडो लोक इमारतींमध्ये अडकले आहेत. पुण्यात बचावकार्यासाठी चक्क रस्त्यावर बोटी चालवण्याची वेळ आली आहे. सतत सुरू असलेल्या पावसामुळे पुण्यातील अनेक भागात वीजपुरवठा खंडीत झाला आहे. तर मुसळधार पावसात दुर्दैवाने चौघांना आपला जीव गमवावा लागला आहे.

राज्यात मोसमी पाऊस सक्रिय झाल्यानंतर मुसळधार पावसाने जनजीवन मोठ्या प्रमाणात विस्कळीत झाले आहे. पुण्याला मोठ्या प्रमाणात पुराचा तडाखा बसला असून विजेचा धक्का लागल्याने तीन तरुणांचा मृत्यू झाला आहे. पुण्यातील भिडे पुलाजवळ सदर घटना घडली आहे.

अंडा भुर्जीचा स्टॉल सुरक्षित ठिकाणी नेत असताना विजेचा धक्का लागून तीन तरुणांचा दुर्दैवी मृत्यू झाला आहे. डेक्कन भागात तीन जणांचा हातगाडी हलविण्याच्या प्रयत्नात विजेचा धक्का लागून मृत्यू झाला. ज्या हातगडीवर व्यवसाय करायचे त्या हातगडीला पुराच्या पाण्यात वाचवताना ही दुर्दैवी घटना घडली आहे.

भोजनालयावर दरड कोसळून एकाचा मृत्यू

तर ताम्हिणी घाट विभागात दरड कोसळून एकाचा मृत्यू झाला तर एक जण जखमी झाला आहे असे मुळशी तहसीलमधील अधिकाऱ्यांनी सांगितले. पौड पोलीस ठाण्याचे निरीक्षक मनोज यादव यांनी सांगितले की, मुळशी तहसीलमधील ताम्हिणी घाटात एका छोट्या भोजनालयावर दरड कोसळल्याने एकाचा मृत्यू झाला तर दुसरा जखमी झाला आहे.

जिल्हा प्रशासन आणि स्थानिक पोलिस रस्त्यावरील ढिगारा हटविण्याचे काम करत असून, ते हटवल्यानंतर रस्ता वाहतुकीसाठी खुला केला जाणार आहे. लवासा परिसरातील एका बंगल्यात तीन जण चिखलात अडकल्याची भीती पोलिसांनी व्यक्त केली आहे.

पुणे जिल्ह्यासाठी पुढील 24 तासांसाठी रेड अलर्ट जारी

खेड, जुन्नर, आंबेगाव, वेल्हा, मुळशी, मावळ, भोर, हवेली हे तालुके आणि पिंपरी चिंचवड तसेच पुणे शहर परिसरातील ‘घाट’ (डोंगरातील खिंडी) विभागातील अतिवृष्टीचा विचार करून शाळांना सुट्टी देण्यात आली आहे. सावधगिरीचा उपाय म्हणून आपत्ती व्यवस्थापन कक्ष आणि राष्ट्रीय आपत्ती प्रतिसाद दल (NDRF) च्या टीम सखल भागात तैनात करण्यात आल्या आहेत. जेथे पूर आणि पूर येण्याची शक्यता आहे.

अत्यावश्यक काम असल्याशिवाय घराबाहेर पडण्याचे आवाहन पुण्याचे जिल्हाधिकारी सुहास दिवसे यांनी केले आहे. आयएमडीने पुणे जिल्ह्यासाठी पुढील 24 तासांसाठी रेड अलर्ट दिला आहे. विनाकरण घराबाहेर पडू नका असे आवाहनही प्रशासनाच्या वतीने करण्यात आले आहे.