टीम लोकमन मंगळवेढा |
उजनी धरणाच्या पाण्यातील भीमा नदीच्या पात्रात वादळी वाऱ्याने उलटलेल्या बोटीतील बेपत्ता झालेल्या व्यक्तींपैकी पाचजणांचे आज गुरुवारी सकाळी शोध कार्य सुरु केल्यानंतर मृतदेह सापडले आहेत. पाण्यात तरंगताना त्यांचे मृतदेह दिसले. त्यानंतर संपुर्ण परिसरात एकच आक्रोश सुरु झाला. या घटनेमुळे परिसरात हळहळ व्यक्त केली जात आहे. या घटनेतील आणखी एक व्यक्ती अजूनही बेपत्ता आहे. बोट उलटलेच्या ठिकाणापासून काही अंतरावर हे मृतदेह सापडले आहेत.
कुगाव येथील अनुराध ज्ञानदेव अवघडे (वय २८ बोट चालक), गौरव धनंजय डोंगरे (वय २४), झरे येथील गोकुळ जाधव (वय ३०), कोमल गोकुळ जाधव (वय २५), माही गोकुळ जाधव (वय ३) व शुभम गोकुळ जाधव (दिड वर्ष) हे बेपत्ता झाले होते. त्यातील पाचजणांचे मृतदेह सापडले आहेत. सोलापूर जिल्ह्याचे वैभव समजल्या जाणाऱ्या उजनी धरण परिसरात मंगळवार दिनांक २१ मे रोजी सायंकाळी मन हेलावून टाकणारी अतिशय धक्कादायक घटना घडली होती. करमाळा तालुक्यातील कुगाव ते इंदापूर तालुक्यातील कळशी दरम्यान वादळी वाऱ्यात एक प्रवासी बोट उलटली होती. या बोटीमधून सात प्रवासी प्रवास करत होते. त्यातील एकजण पोहत बाहेर आल्याने बचावला होता. मात्र सहाजणांचा तपास सुरु होता. आज सकाळी त्यातील पाच मृतदेह मृतदेह सापडले आहेत.
एनडीआरएफचे पथक व खासगी बोटीच्या साह्याने त्यांचे शोधकार्य सुरु होते. घटनेचे वृत्त समजल्यापासून बेपत्ता व्यक्तींचे शोधकार्य सुरु होते. मंगळवारी रात्री अंधारात तपास कार्यात अढथळा आला होता. बुधवारी सकाळी साडेसात वाजता शोध कार्य सुरु झाले. करमाळा हद्दीतील बाजूला कुगावसह परिसरातील नागरिकांकडून शोध घेतला जात होता तर कळशीच्या बाजूनेही शोध मोहीम सुरुच होती. 1 पाणबुडी, 3 बोटी व 20 जवान हे या शोधमोहिमेत सहभागी झाले होते. त्यांच्या मदतीसाठी परिसरातील मच्छिमार व प्रवासी बोटीही सहभागी होऊन मदत कार्य करीत होत्या.
