टीम लोकमन मंगळवेढा |
राज्याचे उपमुख्यमंत्रीअजित पवार यांच्या नेतृत्वातील राष्ट्रवादी काँग्रेसचे नेते बाबा सिद्धिकी यांच्यावर गोळीबार झाल्याची माहिती आहे. त्यांचे पुत्र आमदार झिशान सिद्धिकी यांच्या कार्यालयाबाहेर तीन अज्ञातांनी बाबा सिद्धिकी यांच्यावर गोळीबार केल्याचे प्राथमिक वृत्त आहे.
या गोळीबारात सिद्धिकी यांना गंभीर दुखापत झाली असून त्यांचेवर मुंबईतील लिलावती रुग्णालयात त्यांच्यावर उपचार सुरु आहेत.
बाबा सिद्धिकी यांनी कित्येक वर्षे काँग्रेसमध्ये काम केले. काँग्रेसचे एकेकाळचे ते बडे नेते राहिले. काही महिन्यांपूर्वीच त्यांनी अजित पवार यांच्या राष्ट्रवादी काँग्रेसमध्ये प्रवेश केला होता. अजितदादांच्या राष्ट्रवादीत मुंबई विभागाची जबाबदारी त्यांच्याकडे होती. आज शनिवारी सायंकाळी दसऱ्याच्या दिवशी बाबा सिद्धिकी हे त्यांचे पुत्र झिशान यांच्या कार्यालयासमोर थांबलेले असताना त्यांच्यावर तीन राऊंड फायर करण्यात आले. वांद्रे पूर्व येथे ही गोळीबाराची घटना घडली आहे.
सिद्धिकी यांच्यावर गोळीबार करुन अज्ञात मारेकरी वेगात पळून गेले. सिद्धिकी यांच्या छातीवर एक गोळी लागल्याने सिद्धिकी रक्ताच्या थारोळ्यात पडले. त्यांना तत्काळ मुंबईतील लिलावती रुग्णालयात दाखल करण्यात आले. निर्मलनगर पोलीस या संपूर्ण घटनेचा तपास करीत आहेत. या घटनेने राजकीय वर्तुळात खळबळ उडाली आहे.
