टीम लोकमन मंगळवेढा |
उमरेड-भिवापूर राष्ट्रीयमार्गावरील तास शिवारात एका भरधाव ट्रॅव्हल्सने उभ्या ट्रकला जोरदार धडक दिली. यात ट्रॅव्हल्समधील चार प्रवाशांच्या घटनास्थळीच मृत्यू झाला. तर 22 पेक्षाही अधिक प्रवासी गंभीर जखमी असून, यातील 10 पेक्षा जास्त गंभीर जखमी प्रवाशांना नागपूर येथे उपचारासाठी हलविण्यात आले आहे. सदर अपघात गुरुवार दिनांक 5 सप्टेंबर रोजी सकाळी 11.30 वाजताच्या सुमारास झाला.
सदर अपघातातील मृतांची व जखमींची नावे कळू शकली नाहीत. उपलब्ध झालेल्या माहितीनुसार ट्रॅव्हल्स क्रमांक MH 49 J 8616 ही माँ दुर्गा नामक ट्रॅव्हल्स प्रवाशांना घेऊन नागपूर येथून भिवापूरकडे भरधाव वेगात येत होती. यादरम्यान, शहरालगतच्या तास शिवारातील बसथांबा परिसरात असलेल्या पाणटपरीशेजारी रेशनचे धान्य भरलेला MH 31 AP 2966 हा ट्रक थांबलेला होता. यावेळी भरधाव वेगातील ट्रॅव्हल्सने उभ्या ट्रकसह पाणटपरीला धडक देत ट्रॅव्हल्स थेट शेतात शिरली.
या भीषण अपघातात ट्रॅव्हल्समधील एक महिला, एक मुलगा व दोन पुरुष असे चौघे थेट ट्रॅव्हल्सच्या खाली आले. यातील दोघांच्या शरीरावर तर अक्षरश: ट्रॅव्हल्सचे चाक होते. सदर अपघाताची माहिती मिळताच पोलिसांसह स्थानिक नागरिकांनी घटनास्थळाकडे धाव घेतली. जखमींना भिवापूर येथील ग्रामीण रुग्णालयात उपचारासाठी दाखल करण्यात आले. तर दोन जेसीबीच्या साहाय्याने ट्रॅव्हल्सखाली दबलेले मृतदेह बाहेर काढण्यात आले आहेत. जखमींपैकी 10 पेक्षाही अधिक गंभीर जखमींना नागपूरला पुढील उपचारांसाठी हलविण्यात आले आहे.
अपघात इतका भयानक होता की, ट्रॅव्हलच्या दर्शनी भागाचा अक्षरश: चुराडा झाला असून समोरची दोन्ही चाके सुद्धा निघाली आहेत. मृतांमध्ये भिवापूर व उमरेड येथील प्रत्येकी एक, तर कन्हाळगाव ता. सिंदेवाही, जि. चंद्रपूर येथील एकाचा समावेश आहे. अन्य एकाची ओळख मात्र अद्याप पटलेली नाही. अपघातामुळे राष्ट्रीयमार्गावरील वाहतूक दोन तास विस्कळीत झाली होती.
