सोलापूर : सुरज राऊत
लोकसभेच्या दुसऱ्या टप्प्यातील निवडणूक प्रक्रियेला आजपासून सुरुवात झाली आहे. दुसऱ्या टप्प्यात सोलापूर व माढा हे दोन्ही लोकसभा मतदारसंघ येतात. या दोन्ही लोकसभा मतदारसंघासाठी दिनांक १९ एप्रिल पर्यंत उमेदवारी अर्ज दाखल करता येणार आहेत.
महायुतीकडून सोलापूर लोकसभा या राखीव मतदार संघासाठी भारतीय जनता पार्टीचे माळशिरसचे आमदार राम सातपुते तर माढा लोकसभा मतदारसंघासाठी माढ्याचे विद्यमान खासदार रणजीतसिंह नाईक निंबाळकर यांना भाजपने पुन्हा उमेदवारी दिली आहे. सातपुते आणि निंबाळकर हे दोन्ही उमेदवार येत्या मंगळवारी १६ एप्रिल रोजी आपला उमेदवारी अर्ज दाखल करणार असल्याची अधिकृत माहिती आहे. विशेष बाब म्हणजे हे उमेदवारी अर्ज दाखल करताना महाराष्ट्रातील भारतीय जनता पार्टीचे प्रमुख नेते आणि राज्याचे उपमुख्यमंत्री देवेंद्र फडणवीस हे उपस्थित राहणार आहेत.
रणजीतसिंह नाईक निंबाळकर आणि राम सातपुते हे दोघे देवेंद्र फडणवीस यांच्या अतिशय जवळचे आणि विश्वासू कार्यकर्ते म्हणून परिचित आहेत. यामुळे सोलापूर व माढा या दोन्ही लोकसभा मतदारसंघाची निवडणूक देवेंद्र फडणवीस यांच्यासाठी प्रतिष्ठेची असणार आहे.
सोलापूर व माढा या दोन्ही लोकसभा मतदारसंघात महायुती व महाविकास आघाडीकडून तगडे उमेदवार रिंगणात उतरवल्याने या निवडणुकीत चुरस वाढली आहे. भारतीय जनता पार्टीने हे दोन्ही मतदारसंघ आपल्याकडेच ठेवण्यासाठी प्रतिष्ठा पणाला लावली आहे तर महाविकास आघाडीने हे दोन्ही मतदारसंघ भाजपकडून खेचून घेण्यासाठी कंबर कसली आहे त्यामुळे या दोन्ही मतदारसंघातील निवडणुकीकडे संपूर्ण राज्याचे लक्ष लागले आहे.
