मंगळवेढा : अभिजीत बने
विद्यार्थी आणि पालकांसाठी एक अत्यंत महत्त्वाची बातमी आहे. महाराष्ट्र राज्यातील प्राथमिक शिक्षक आज एक दिवसाचे सामूहिक रजा आंदोलनावर जाणार आहेत. राज्यभरातील जवळपास पावणेदोन लाख शिक्षक या आंदोलनात सहभागी होणार असल्याने अंदाजे 40 हजार शाळा आज बंद राहणार असल्याची शक्यता आहे. यामुळे विद्यार्थ्यांचे मोठे शैक्षणिक नुकसान होणार आहे.
राज्यातील गुरुजींच्या या आंदोलनामुळे राज्यातील 2 लाख विद्यार्थ्यांचे शैक्षणिक भवितव्य आंधारात येणार आहे. राज्यात सुधारीत शिक्षक संच मान्‍यता आणि कंत्राटी शिक्षक भरतीच्‍या निर्णयाची अंमलबजावणी करण्‍याची भूमिका राज्य सरकारने घेतली आहे. राज्य शासनाच्या या भूमिकेला राज्यातील सर्व शिक्षक संघटनांनी कडाडून विरोध केल्याचे पाहायला मिळत आहे.
सुधारीत शिक्षक संच मान्‍यता आणि कंत्राटी शिक्षक भरतीच्‍या निर्णयाची अंमलबजावणी सुरु झाल्‍यास राज्‍याच्‍या ग्रामीण भागातील 1 लाख 85 हजार विद्यार्थी आणि 29 हजाराहून अधिक शिक्षकांचे भवितव्य अंधारात जाण्‍याची भीती व्यक्त करण्यात येत आहे. राज्य शासनाने हे दोन्‍ही निर्णय रद्द करावेत यासाठी राज्यभरातील सर्व शिक्षक संघटना एकवटल्‍या आहेत. या संदर्भात राज्याचे शालेय शिक्षण मंत्री दीपक केसरकर यांच्याशी सकारात्मक चर्चा झाली. मात्र कुठलाच ठोस निर्णय शासनाने घेतला नाही. त्यामुळे सर्वच शिक्षक आंदोलनात उतरले आहेत.
कमी पटसंख्येच्या शाळांमध्ये शिक्षकांची कंत्राटी नियुक्ती, विद्यार्थ्यांना गणवेश न मिळणे, अध्यापन सोडून करावी लागणारी प्रशासकीय कामे अशा विविध मुद्द्यांवर राज्यातील शिक्षक आज आंदोलन करणार आहेत. शिक्षक संघटनातर्फे राज्यातील जिल्हाधिकारी कार्यालयावर मोर्चा काढण्याचे नियोजन करण्यात आले आहे. त्याचाच परिणाम म्हणून राज्यातील बहुतांश ठिकाणी प्राथमिक शाळा बंद राहणार आहेत.
शिक्षण विभागाच्या या निर्णयाविरोधात प्राथमिक शिक्षकांची काही दिवसांपूर्वी पुणे येथे बैठक आयोजित करण्यात आली होती. यात शिक्षण विभागाच्या अधिकाऱ्यांचा सहभाग असलेले व्हॉट्सॲप ग्रुप सोडणे, काळी फित लावून काम करणे, अशाप्रकारचे विरोध दर्शवण्यात आले होते. मात्र आता शिक्षकांनी एक दिवसांची रजा घेऊन जिल्हाधिकारी कार्यालयावर मोर्चा करण्याचे ठरवल्याने त्याचा परिणाम राज्यातील बहुतांश शाळांवर होणार आहे. तसेच विद्यार्थ्यांचे शैक्षणिक नुकसानही यामुळे होणार आहे.
सामूहिक नेतृत्वाखाली निघणारा आजचा मोर्चा ऐतिहासिक होणार
वर्षानुवर्षे तेच तेच प्रश्न घेऊन आम्ही शासनाकडे आक्रोश करतोय. परंतु शासन झोपेचे सोंग घेऊन बसले आहे. या शासनाला जागे करण्यासाठी, गोरगरिबांच्या मराठी शाळा टिकवण्यासाठी, विद्यार्थ्यांना शिकू द्या, शिक्षकांना शिकवू द्या. या मागणीसाठी आज जिल्ह्यातील प्राथमिक शाळा शंभर टक्के बंद असणार आहेत.
सौ. ज्योती सचिन कलुबर्मे
जिल्हाध्यक्षा, महाराष्ट्र राज्य प्राथमिक शिक्षक समिती, सोलापूर
