टीम लोकमन मंगळवेढा |
राष्ट्रीय लोकशाही आघाडी अर्थात एनडीए सरकारचा आज शपथविधी होत आहे. पंतप्रधान नरेंद्र मोदी एनटीए सरकारचे पंतप्रधान म्हणून आज दिल्लीमध्ये शपथ घेणार आहेत. दरम्यान, एनडीए सरकारमध्ये कोणाकोणाची वर्णी लागणार? याची चर्चा रंगली असतानाच महाराष्ट्रामधून पाच जणांचे मंत्रिपद जवळपास निश्चित झाले आहे. ज्या खासदारांचा मंत्रिमंडळामध्ये समावेश करण्यात येणार आहे त्यांना दिल्लीतून फोनाफोनी केली जात आहे.
राज्यातील भाजपच्या तीन खासदारांना मंत्रिपदासाठी फोन
यामध्ये महाराष्ट्रातून आतापर्यंत भाजपचे नितीन गडकरी, पियुष गोयल आणि उत्तर महाराष्ट्रातून रक्षा खडसे यांना मंत्रीपदाची संधी देण्यात आली आहे. आरपीआयकडून रामदास आठवले यांना तिसऱ्यांदा मंत्रीपदाची संधी देण्यात येत आहे. दुसरीकडे शिंदे गट आणि अजित पवार यांच्या वाट्याला किती मंत्रीपदे येणार याचीही चर्चा रंगली असतानाच शिंदे गटाकडून प्रतापराव जाधव यांना मंत्रिपदासाठी फोन गेला आहे.
अजित पवार गट अजूनही वेटिंगवरच
गेल्या दोन दिवसांपासून अजित पवार गटाकडून माजी केंद्रीय मंत्री प्रफुल पटेल यांच्या नावावर शिक्कामोर्तब झाल्याची चर्चा माध्यमांमध्ये रंगली होती. मात्र प्रफुल पटेल यांना अजूनही मंत्रीपदासाठी फोन गेलेला नाही. राष्ट्रवादीच्या नेत्यांनी दिल्लीत तळ ठोकला आहे. मात्र अजूनही त्यांना मंत्रिपदाबाबत फोन आलेला नाही. त्यामुळे अजित पवार गट मंत्रीपदासाठी अजूनही वेटिंगवरच असल्याचे चित्र आहे.
दरम्यान, राज्यामध्ये मंत्रिपदे देत असताना प्रादेशिक समतोल राखला जाणार आहे. याचा विचार केल्यास विदर्भातून नितीन गडकरी हे मंत्रीपदी असतील, तर मुंबईतून पियुष गोयल असणार आहेत. रामदास आठवले जातीय समीकरणातून मंत्रीपदी असतील, तर उत्तर महाराष्ट्रातून रक्षा खडसे यांना संधी देण्यात आली आहे. त्यामुळे आता पश्चिम महाराष्ट्र, कोकण आणि मराठवाड्यातून मंत्रीपद दिले जाते का? याकडे सुद्धा राज्याचे लक्ष लागले आहे.
नारायण राणेंना अजूनही फोन नाहीच
विशेष म्हणजे नारायण राणे यांना मंत्रिपदासाठी अजूनही फोन गेलेला नाही. त्यामुळे राजकीय जाणकारांच्या भूवया उंचावल्या आहेत. उदयनराजे भोसले यांच्या नावाची सुद्धा चर्चा होती. मात्र अजून त्यांनाही फोन आलेला नाही. दरम्यान राष्ट्रीय लोकशाही आघाडीमध्ये प्रादेशिक पक्षांना महत्त्व प्राप्त झाल्याने त्यांना सुद्धा मंत्रीपद मिळणे अपेक्षित आहे. नितीश कुमार यांच्या जेडीयू आणि चंद्रबाबू नायडू यांच्या टीडीपीने महत्त्वाच्या पदांवर दावा केल्याने नेमकी कोणती मंत्रिपदे दिली जाणार? याकडे सुद्धा सर्वांचेच लक्ष लागले आहे.
