टीम लोकमन सोलापूर |
सोलापूर जिल्हा परिषदेच्या प्राथमिक शिक्षण विभागाचे उपशिक्षणाधिकारी संजय जावीर यांची महाराष्ट्र शिक्षण सेवा गट अ (प्रशासन शाखा) मधील शिक्षणाधिकारी तथा शिक्षण निरीक्षकपदी बृहन्मुंबई, पश्चिम विभाग मुंबई येथे पदोन्नतीवर बदली करण्यात आली आहे.
उपशिक्षणाधिकारी संजय ज्ञानदेव जावीर यांची 2011 मध्ये महाराष्ट्र लोकसेवा आयोगाच्या परिक्षेमधून गटशिक्षणाधिकारी तथा उपशिक्षणाधिकारीपदी निवड झाली होती. त्यानंतर त्यांनी सांगली जिल्ह्यातील जत व सोलापूर जिल्ह्यातील सांगोला येथे गटशिक्षणाधिकारीपदी काम केले आणि 2020 पासून ते सोलापूर जिल्हा परिषदेच्या प्राथमिक शिक्षण विभागाचे उपशिक्षणाधिकारी म्हणून कार्यरत आहेत.
याठिकाणी शिक्षणाधिकारी पदाचा पदभारही त्यांनी 11 महिने यशस्वीरित्या सांभाळला आहे. सध्या उपशिक्षणाधिकारी संजय जावीर यांच्याकडे उपशिक्षणाधिकारी (प्राथमिक) या पदाबरोबरच सोलापूर महानगरपालिकेच्या शिक्षण मंडळाच्या प्रशासन अधिकारी पदाचा अतिरिक्त कार्यभारही आहे.
संजय जावीर यांची उपशिक्षणाधिकारी पदी निवड होण्यापूर्वी ते मंगळवेढा येथील इंग्लिश स्कूल येथे 17 वर्षे सहशिक्षक म्हणून कार्यरत होते. या कार्यकाळात त्यांचा एक आदर्श शिक्षक म्हणून संपूर्ण मंगळवेढा तालुक्यात मोठा नावलौकिक होता. त्यांचे वडिल ज्ञानदेव जावीर हे देखील शिक्षणाधिकारी म्हणून सेवानिवृत्त झाले आहेत. त्यांनीही सोलापूर जिल्हा परिषद व सोलापूर महानगरपालिकेच्या प्रशासन अधिकारी पदावर काम केले आहे आणि आज त्याच पदावर त्यांचे चिरंजीव उपशिक्षणाधिकारी संजय जावीर यांनाही काम करण्याचा योग आला आहे. राज्यात शिक्षणाधिकाऱ्यांच्या मुलाला शिक्षणाधिकारी होण्याचा मान मंगळवेढ्यातील पिता पुत्रांना मिळाल्याने त्यांचे सर्वत्र अभिनंदन होत आहे.
उपशिक्षणाधिकारी संजय जावीर यांच्या पदोन्नतीबद्दल मंगळवेढा पंढरपूर विधानसभा मतदारसंघाचे आमदार समाधान आवताडे, सोलापूर जिल्हा परिषदेचे मुख्य कार्यकारी अधिकारी कुलदिप जंगम, प्रशासन विभागाच्या उपमुख्य कार्यकारी अधिकारी स्मिता पाटील, सोलापूर महानगरपालिकेच्या आयुक्त शितल तेली-उगले, उपायुक्त तैमूर मुलाणी, सोलापूर जिल्हा परिषदेच्या प्राथमिक शिक्षण विभागाचे शिक्षणाधिकारी कादर शेख, माध्यमिक शिक्षण विभागाचे शिक्षणाधिकारी सचिन जगताप आदींनी अभिनंदन केले.
