टीम लोकमन मंगळवेढा |
राष्ट्रपती भवनात नरेंद्र मोदी यांनी तिसऱ्यांदा पंतप्रधानपदाची शपथ घेतली. राज्यात मोदींच्या शपथविधीची जेवढी चर्चा आहे तेवढीच चर्चा अजित पवारांच्या गटाला एकही मंत्रिपद न मिळाल्यामुळे होतना दिसत आहे. यावरुन विरोधकांनी देखील अजित पवारांना टोला लगावला आहे. मानसन्मान संख्याबळावर मिळतो, असा टोला राज्याचे विरोधी पक्षनेते विजय वडेट्टीवारांनी केला आहे. महिन्याभरात राष्ट्रवादी आणि शिवसेनेचे आमदार माघारी परततील, असा दावाही वडेट्टीवारांनी केला आहे.
विजय वडेट्टीवार म्हणाले, अजितदादांना जे पाहिजे ते मिळवायचा प्रयत्न केले पण अपयश आले. कुणालाही मान सन्मान संख्याबळावर मिळतो. अजित पवारांची स्थिती सन्मान करण्यासारखी काही राहिली नाही. जे मिळेल ते खावे, राज्यमंत्रीपद मिळाले तर ठीक नाही तर तेही मिळणार नाही अशी अवस्था आहे.
उपयोग झाला की फेकून द्यायचे ही भाजपची नीती : विजय वडेट्टीवार
भाजप सोबत घेते पण पक्ष संपवते, हे अजित पवारांना आता समजले असेल, असा टोला काँग्रेसचे नेते विजय वडेट्टीवार यांनी लगावला. उद्धव ठाकरेंना समजले तसे ते दूर गेले. भाजप हा बेईमानांचा पक्ष आहे. उपयोग झाला की फेकून द्यायचे ही त्यांची नीती आहे, असेही वडेट्टीवार म्हणाले.
अजितदादा किंवा शिंदे यांचे 40 आमदार घरवापसी करतील : वडेट्टीवार
शिंदेंच्या आमदार घरवापसीवर वडेट्टीवार म्हणाले, गद्दारांची शिक्का लागलेली ही मंडळी आहेत. बोलायला जागा नाही, ही गद्दारी शिक्का लागलेली मंडळी आहेत. पार्टी संपली आहे, गेलेले अजितदादा किंवा शिंदे यांचे 40 आमदार घरवापसी करतील अशी परिस्थिती आहेत. संपर्क साधत असल्याची माहिती आहे. चर्चा जोरात आहेत कारण वारे हे महाविकास आघाडीच्या बाजूने आहे.
