टीम लोकमन मंगळवेढा |
आपल्यावरील अन्याय किंवा अत्याचारा विरुद्ध दाद मागण्याचे अंतिम ठिकाण म्हणजे न्यायालय होय. लोकशाही प्रक्रियेत न्यायालय ही स्वतंत्र यंत्रणा अस्तित्वात असल्याने प्रशासन आणि राजकीय दबाव यांच्याविरुद्धची लढाई सुद्धा मोठ्या आशेने न्यायालयात लढली जाते.
मात्र चक्क न्यायाधीश महोदयांनाच लाचलुचपत प्रतिबंधक विभागाने पकडल्याने संपूर्ण राज्यात एकच खळबळ उडाली आहे. साताऱ्यातील एका हॉटेलमध्ये सापळा रचून न्यायाधीश महोदयांना पोलिसांनी रंगेहात पकडले आहे. त्यानंतर गुन्हा दाखल करण्यात आला असून पुढील प्रक्रिया सुरु आहे. विशेष म्हणजे न्यायालयाच्या आवारातच ही घटना घडलीय. या घटनेमुळे सर्वसामान्यांच्या न्याय-हक्कासाठीचे शेवटचे आश्वासक ठिकाण असलेल्या न्यायपालिकेवरील विश्वासाला देखील या घटनेने तडा गेला आहे.
पुणे-सातारा अँटी करप्शन विभागाने संयुक्तपणे साताऱ्यात हि मोठी कारवाई केली आहे. सातारा जिल्हा न्यायालयातील न्यायाधीश महोदयांविरुद्धच गुन्हा दाखल झाला आहे. जिल्हा व सत्र न्यायाधीश धनंजय निकम यांच्यासह तिघांना लाचलुचपत प्रतिबंधक विभागाने रंगेहात पकडले असून त्यानंतर गुन्हा दाखल करुन पुढील कारवाईची प्रक्रिया सुरु आहे. पाच लाख रुपयांच्या लाच प्रकरणात न्यायाधीश महोदयांसह तीघांना रंगेहात पकडल्याने न्यायपालिका क्षेत्रात मोठी खळबळ उडाली आहे.
फिर्यादीच्या वडिलांना जामिन देण्यासाठी पाच लाखांची मागणी करण्यात आली होती अशी प्राथमिक माहिती आहे. विशेष म्हणजे जिल्हा सत्र न्यायालयाच्या आवारातच या सर्व घडामोडी घडल्या आहेत. येथील एका हॉटेलमध्ये सापळा रचून अँटीकरप्शन विभागाच्या पोलिसांनी सर्वांना रंगेहात पकडले आहे. त्यानंतर कायदेशीर प्रक्रियेद्वारे गुन्हा दाखल करण्यात आला आहे. दरम्यान या घटनेने सातारा जिल्ह्यासह संपूर्ण राज्यात खळबळ उडाली आहे. ज्या न्यायव्यवस्थेवर सामान्य माणसांचा शेवटचा विश्वास असतो आता त्याच न्यायव्यवस्थेवर या कारवाईने प्रश्नचिन्ह उपस्थित होत आहे.
सर्वसामान्य नागरिकांचा विश्वास हा न्यायपालिकेवर आहे. पोलिस यंत्रणांकडून अन्याय झाला तरी न्यायालयात आपणास दाद मिळेलच. न्यायाधीशांच्या खुर्चीवर बसलेल्या न्यायमूर्तींकडून आपल्यावरील अन्याय दूर होईल. अशीच सर्वसाधारण भावना असते. मात्र चक्क न्यायाधीश महोदयच लाच घेताना आढळल्याने नेमका विश्वास ठेवायचा कुणावर असा प्रश्न देखील यानिमित्ताने उपस्थित होत आहे. पोलीस व प्रशासनातील भ्रष्टाचाराच्या अनेक घटना सातत्याने समोर आल्या आहेत. पण थेट न्यायपालिकेतील वरिष्ठच अडकल्याने सर्वत्र खळबळ उडाली आहे.
