टीम लोकमन पंढरपूर |
एस.के.एन. सिंहगड अभियांत्रिकी महाविद्यालय, पंढरपूरच्या मेकॅनिकल विभागात SolidWorks सॉफ्टवेअरवरील विशेष मूल्यवर्धन प्रशिक्षण कार्यक्रम मोठ्या उत्साहात सुरू झाला. कार्यक्रमाचे उद्घाटन महाविद्यालयाचे प्राचार्य डॉ. के.जे.करांडे, उपप्राचार्य डॉ.स्वानंद कुलकर्णी, विभाग प्रमुख डॉ. शाम कुलकर्णी, इतर प्राध्यापक वर्ग, विद्यार्थी आणि तंत्रज्ञान क्षेत्रातील मयुर बेलेकर व प्रथमेश दळवी या मान्यवरांच्या उपस्थितीत पार पडले.
छत्रपती संभाजीनगर येथील इंडो-जर्मन टूल रूमच्या सहकार्याने राबविण्यात येणाऱ्या या कार्यक्रमामुळे विद्यार्थ्यांना प्रगत औद्योगिक कौशल्ये आत्मसात करण्याची संधी मिळणार आहे. विभाग प्रमुख डॉ. शाम कुलकर्णी यांनी विद्यार्थ्यांना मार्गदर्शन करत SolidWorks सॉफ्टवेअरचे उद्योग क्षेत्रातील महत्त्व उलगडून दाखवले. त्यांनी या सॉफ्टवेअरमुळे उत्पादकता कशी वाढते आणि व्यावसायिक डिझाइन प्रक्रियांना गती कशी मिळते याबाबत माहिती सांगीतली.
कार्यक्रमाचे समन्वयक प्रा. प्रसाद कुलकर्णी यांनी SolidWorks सॉफ्टवेअरची सविस्तर माहिती देताना सांगितले की, या सॉफ्टवेअरमुळे प्रॉडक्ट डिझाइन, सिम्युलेशन आणि इतर प्रगत डिझाइन प्रक्रिया विद्यार्थ्यांना शिकता येतील, ज्यामुळे त्यांचे औद्योगिक क्षेत्रातील कौशल्य व कार्यक्षमता वाढेल.
महाविद्यालयाचे प्राचार्य डॉ. के. जे. करांडे आणि उपप्राचार्य डॉ. स्वानंद कुलकर्णी यांनी विद्यार्थ्यांना प्रेरित करत असे कार्यक्रम केवळ तांत्रिक ज्ञान विकसित करण्यापुरते मर्यादित नसून, ते विद्यार्थ्यांच्या व्यावसायिक यशासाठी मार्गदर्शक ठरतात, असे सांगितले. त्यांनी विद्यार्थ्यांना या प्रशिक्षणाचा पूर्ण लाभ घेण्याचे आवाहन केले.
या कोर्समध्ये SolidWorks सॉफ्टवेअरच्या विविध उपयोजनांवर विशेष भर दिला जाणार आहे. यात 3D डिझाइन, सिम्युलेशन, फायनाईट एलिमेंट ऍनालिसिस (FEA) आणि इतर प्रगत संकल्पनांचा समावेश असेल. या उपक्रमामुळे विद्यार्थ्यांना प्रकल्प व्यवस्थापन आणि डिझाइनच्या व्यावसायिक गरजांमध्ये जास्त चांगल्या प्रकारे काम करता येईल. विद्यार्थ्यांनी या कार्यक्रमाचा संपूर्ण लाभ घेऊन आपले तांत्रिक कौशल्य प्रगल्भ करण्याचा निर्धार केला आहे. SolidWorks सॉफ्टवेअरचे प्रशिक्षण औद्योगिक क्षेत्रातील नोकऱ्यांसाठी त्यांना निश्चितच स्पर्धात्मक स्थान निर्माण करून देईल.
महाविद्यालयाने असे उपक्रम भविष्यातही सातत्याने राबविण्याचा मानस व्यक्त केला आहे, ज्यामुळे विद्यार्थी आधुनिक तंत्रज्ञानाशी सुसंगत राहतील आणि जागतिक औद्योगिक गरजांशी जोडले जातील. सदरील कार्यक्रम यशस्वी करण्यासाठी महाविद्यालयाचे प्राचार्य, उपप्राचार्य, मेकॅनिकल विभागाचे विभाग प्रमुख, शिक्षक व शिक्षकेतर कर्मचारी यांनी परिश्रम घेतले.
