टीम लोकमन सोलापूर |
सोलापूर मधून पुण्यात गेलेल्या तरुणांना नोकरी व राहण्यासाठी मदत करणाऱ्या सोलापूर जिल्हा सेवा संघाने गुरुवारी सोलापूर लोकसभेचे भारतीय जनता पार्टीचे उमेदवार राम सातपुते यांना पाठिंबा जाहीर केला. यामुळे राम सातपुते यांना पाठिंबा वाढत असल्याचे दिसत आहे.
सातपुते अक्कलकोटच्या प्रचार दौऱ्यावर असताना आळगे गावांमध्ये महेश बारसावडे यांनी हा बिनशर्त पाठिंबा जाहीर केला. याप्रसंगी भाजपचे जिल्हाध्यक्ष तथा अक्कलकोटचे आमदार सचिन कल्याणशेट्टी, जिल्हा परिषदेचे माजी अध्यक्ष शिवानंद पाटील, स्वामी समर्थ साखर कारखान्याचे अध्यक्ष संजीव कुमार पाटील, भाजपाचे अक्कलकोट तालुका अध्यक्ष मोतीराम राठोड आदी मान्यवर उपस्थित होते.
सोलापूर जिल्हा सेवा संघाची नुकतीच बैठक पार पडली या बैठकीमध्ये महायुतीचे उमेदवार राम सातपुते यांना बिनशर्त पाठिंबा देण्याचा निर्णय घेण्यात आला. सोलापुरातून शिक्षण व नोकरीसाठी पुण्यात गेलेल्या तरुणांना मदत करण्याचे काम सोलापूर जिल्हा सेवा संघ करीत आहे. सेवा संघाने मदत केलेल्या सर्व तरुणांना भेटून व दूरध्वनीवरून संपर्क करून महायुतीचे उमेदवार राम सातपुते यांना मतदान करण्याचे आवाहन करण्यात येणार असल्याचे सोलापूर जिल्हा सेवा संघाचे अध्यक्ष महेश बारसावडे यांनी सांगितले. यावेळी उपाध्यक्ष राजेंद्र आगवणे, सचिव शिवानंद जाधव यांचेसह श्रीकांत चव्हाण, माणिक सुभेदार, पंढरीनाथ आयाचित, बालाजी शिंदे आदी उपस्थित होते.
