टीम लोकमन सोलापूर |
आषाढी वारी २०२४ अंतर्गत सोलापूर जिल्हयात मानाच्या १० पालख्यांच्या मार्गावरील ७७ गावामध्ये वारकऱ्यांसाठी १९२ शासकीय व ९७ खाजगी व इतर १० असे एकूण २९९ टँकरने पिण्यासाठी पुरेसा व शुध्द पाणी पुरवठा करण्याचे नियोजन करण्यात आले असल्याची माहिती जिल्हा परिषदेच्या मुख्य कार्यकारी अधिकारी मनिषा आव्हाळे यांनी दिली.
याबाबत मुख्य कार्यकारी अधिकारी मनिषा आव्हाळे यांनी सांगीतले की, आषाढी वारीसाठी सोलापूर जिल्हयात श्री. संत ज्ञानेश्वर महाराज यांची पालखी दि. १० जुलै २०२४ रोजी तर श्री. संत तुकाराम महाराज यांची पालखी दि. ११ जुलै २०२४ रोजी प्रवेश करीत आहे. जिल्हयात ९ तालुक्यात श्री. संत ज्ञानेश्वर महाराज, श्री. तुकाराम महाराज, श्री. संत मुक्ताबाई, श्री. संत सोपानकाका महाराज, श्री. संत निवृत्तीनाथ महाराज, श्री. संत एकनाथ महाराज, श्री. संत गजानन महाराज, श्री. संत निळोबाराय महाराज, श्री क्षेत्र कौडण्यपूर, श्री. संत योगीराज चांगावटेश्वर महाराज या दहा मानाच्या पालख्या प्रवेश करतात. त्यामुळे सदर मानाच्या १० पालख्यांच्या मार्गावरील ७७ गावामध्ये वारक-यांसाठी १९२ शासकीय व ९७ खाजगी व इतर १० असे एकूण २९९ टँकरने पिण्यासाठी पुरेसा व शुध्द पाणी पुरवठा करण्याचे नियोजन करण्यात आले आहे.
या टँकरमध्ये पाणी भरण्यासाठी बोअर व विहीर अशा एकूण ७९१ स्त्रोत निश्चित करून या स्त्रोतांचे जलशुध्दीकरण करण्यात आले आहे. तसेच पाणी शुध्दीकरणासाठी प्रती २५ किलोचे १ हजार ५३० इतकी पोती टी.सी.एल. पावडरचा पुरवठा पालखी मार्गावरील ग्रामपंचायतींना करण्यात आला आहे.
सुनिल कटकधोड कार्यकारी अभियंता, ग्रामीण पाणी पुरवठा विभाग
आषाढी वारीमध्ये सहभागी झालेल्या वारकऱ्यांना पिण्यासाठी शुध्द पाणीपुरवठा करण्यासाठी ग्रामीण पाणीपुरवठा विभाग, उपविभाग, आरोग्य विभाग तसेच ग्रामपंचायतीमधील अधिकारी व कर्मचारी यांचेवर जबाबदारी निश्चित करण्यात आली आहे. सदर अधिकारी व कर्मचारी यांना पाणी पुरवठा नियमन करणे, टी.सी.एल. पावडरचा पुरवठा करणे, पाणी स्त्रोतांच्या ठिकाणी दिवाबत्तीची सोय करणे, टँकर भरण्याच्या जागा निश्चित करणे, पालखी मार्गावरील सर्व उदभवांचे सर्वेक्षण करणे, पाणी नमुने तपासणी करणे, पाणी शुध्दीकरण करून पुरवठा करणे या कामांची जबाबदारी देण्यात आली आहे.
अमोल जाधव उपमुख्य कार्यकारी अधिकारी (पाणी व स्वच्छता)
पालखी मार्गावरील पिण्याच्या पाण्याच्या सर्व उदभवांचे सर्वेक्षण करणे, पाणी नमुने तपासणी करणे आणि वारकऱ्यांना पाणी शुध्दीकरण करून पुरवठा करणे. आदी कामे अतिशय जबाबदारीने करण्यासाठी आरोग्य विभागाचे अधिकारी व कर्मचारी हे दक्षता घेत आहेत.
डॉ. संतोष नवले जिल्हा आरोग्य अधिकारी
