सर्वात मोठी बातमी ! उपमुख्यमंत्री अजितदादा पवार बारामतीतून विधानसभा निवडणूक लढणार नाहीत? ; राज्याच्या राजकारणात खळबळ

टीम लोकमन मंगळवेढा |

राज्याच्या राजकारणातील अत्यंत महत्वाची बातमी समोर येत असून राज्याचे उपमुख्यमंत्री अजित पवार यंदा बारामतीतून विधानसभेची निवडणूक लढणार नसल्याची चर्चा होत आहे. अजितदादांऐवजी आता त्यांचे पुत्र जय पवार बारामतीतून विधानसभेची निवडणूक लढणार असल्याची चर्चा होत आहे.

शरद पवार गटाकडून बारामतीतून युगेंद्र पवार यांना विधानसभेची उमेदवारी दिली जाण्याची दाट शक्यता आहे. त्यामुळे जर अजित पवार यांच्या जागेवर जय पवार यांनी विधानसभेची निवडणूक लढली तर नवी राजकीय समीकरणे समोर येण्याची शक्यता आहे. त्यामुळे यंदा बारामतीत युगेंद्र पवार विरूद्ध जय पवार अशी लढत रंगण्याची शक्यता आहे.

अजितदादा पवार काय म्हणाले होते?

लोकसभा निवडणुकीवेळी अजित पवार यांनी जाहीर भाषणात एक विधान केले होते. अजित पवार यांचे हेच भाषण सध्या प्रचंड व्हायरल होत आहे. या भाषणातील अजित पवारांचे वक्तव्य पाहता अजितदादा आता बारामतीतून विधानसभा निवडणूक लढणार नसल्याचीच चर्चा होत आहे. 16 फेब्रुवारी रोजीचे अजित पवार यांचे हे भाषण आहे. लोकसभेला बारामतीतून आपल्या विचारांचा खासदार निवडून दिला नाही. तर मी बारामतीतून विधानसभा निवडणुकीला उभं राहीन. नाती तर तुम्ही जर मला साथच देणार नसाल तर मला माझा संसार आहे. मी निवडणूक लढणार नाही, असे अजित पवार या सभेत म्हणाले होते. त्यांचे हेच भाषण सध्या प्रचंड व्हायरल होत आहे.

2024 च्या लोकसभा निवडणुकीत पहिल्यांदाच पवार कुटुंब एकमेकांच्या विरोधात निवडणुकीत उभे होते. सुप्रिया सुळे विरूद्ध सुनेत्रा पवार अशा झालेल्या या लढतीत सुप्रिया सुळे जिंकल्या. मात्र त्यानंतर आता अजित पवार यांच्या जुन्या भाषणाचा व्हीडिओ सोशल मीडियावर व्हायरल होत आहे. अजित पवार यंदाची विधानसभेची निवडणूक लढणार नसल्याचे बोलले जात आहे.

दादांच्या समर्थकांचे काय आहे म्हणणे?

बारामतीत राष्ट्रवादीच्या अजितदादा गटाचे कार्यकर्ते म्हणतात, अजितदादा पवार बारामतीतून लढणार नाहीत, ही केवळ चर्चा आहे. यात कोणत्याही प्रकारचे तथ्य नाही. बारामती म्हणजे अजित पवार अशी ओळख आहे. त्यामुळे अजितदादा असा निर्णय घेणार नाहीत आणि त्यांनी तसा निर्णय घेऊ नये असेही अजित पवार यांच्या समर्थकांना वाटते.