टीम लोकमन मंगळवेढा |
राजकीय वर्तुळातून मोठी बातमी समोर येत असून राज ठाकरे यांचे जुने सहकारी वसंत मोरे हे आज शिवसेना उद्धव बाळासाहेब ठाकरे गटाचे प्रमुख उद्धव ठाकरे यांची भेट घेणार आहेत. मिळालेल्या माहितीनुसार आज दुपारी मुंबई येथे ‘मातोश्री’वर ही भेट होणार आहे.
वसंत मोरे हे उद्धव ठाकरेंना भेटण्यासाठी ‘मातोश्री’वर येणार आहेत. वसंत मोरे यांच्यासोबत शिवसेना ठाकरे गटाचे नेते खासदार संजय राऊत आणि उपनेते साजन पाचपुते हे देखील ‘मातोश्री’वर उद्धव ठाकरेंच्या भेटीसाठी येणार आहेत.
मिळालेल्या माहितीनुसार वसंत मोरे हे शिवसेना ठाकरे गटात प्रवेश करण्यासाठी इच्छूक असून ते लवकरच शिवसेना ठाकरे गटात प्रवेश करण्याची शक्यता आहे. दरम्यान त्यापूर्वी ते आज उद्धव ठाकरे यांच्यासोबत चर्चा करण्यासाठी ‘मातोश्री’वर जाणार आहेत. लोकसभा निवडणुकीत पुण्यातून आपल्याला उमेदवारी मिळावी यासाठी वसंत मोरे यांनी संजय राऊत यांची भेट घेतली होती. मात्र महाविकास आघाडीमध्ये पुण्याची ही जागा काँग्रेसच्या वाट्याला गेली होती.
काँग्रेसकडून या ठिकाणी आमदार रवींद्र धंगेकर यांना उमेदवारी देण्यात आली होती. तर भाजपकडून मुरलीधर मोहोळ यांना निवडणुकीच्या रिंगणात उतरवण्यात आले होते. वसंत मोरे लोकसभेची ही निवडणूक वंचित बहुजन आघाडीकडून लढले होते. त्यामुळे पुण्यात तिरंगी लढत पाहायला मिळाली. या निवडणुकीत भाजपचे उमेदवार मुरलीधर मोहोळ यांनी बाजी मारली आणि त्यांना केंद्रात मंत्रीपदही मिळाले. आता आगामी विधानसभा निवडणुकीचा विचार करता वसंत मोरे शिवसेना ठाकरे गटात प्रवेश करतील अशी चर्चा राजकीय वर्तुळात जोर धरत आहे.
